Ciidanka Xoogga Dalka oo Howlgal qorsheysan ku dilay Sarkaal ka tirsan Al-Shabaab.

by admin | Sunday, May 19, 2024 | 34 views

Dowladda Federaalka Soomaaliya ayaa sheegtay in howlgal qorsheysan oo ka dhacay deegaanka Golweyn ee gobolka Shabeellaha Hoose lagu dilay sarkaal ka tirsanaa Al-Shabaab oo lagu magacaabi jiray Cabdulqaadir Xaaji Eenoow. Howlgalkan ayaa qeyb ka ahaa dadaallada ay ciidamada xoogga dalka Soomaaliyeed ku doonayaan in ay kula dagaalamaan argagixisada iyo sugidda amniga gobolka.

Sida ay dowladdu sheegtay, howlgalka ayaa ahaa mid qorsheysan oo la fuliyay ka dib markii la helay “siro dhammaystiran oo ku saabsan goobta iyo dhaqdhaqaaqyada Cabdulqaadir Xaaji Eenoow”. Ururka 26-aad, guutada 6-aad ee qeybta 60-aad ee ciidanka XDS ayaa fuliyay howlgalkan, waxaana lagu dilay sarkaalkii ka tirsanaa Al-Shabaab.

Faarax Maxamuud Xirsi oo ah taliyaha qeybta 26-aad ayaa xaqiijiyay in ay si dhow ula socdeen dhaq dhaqaaqa Eenow iyo dhaq dhaqaaqiisa, taasoo ugu dambeyntii keentay in howlgalka lagu guuleysto. “Muddo muhiim ah ayaan la soconay dhaq-dhaqaaqyada iyo xog uruurinta Cabdulqaadir Xaaji Eenow, howlgalka maantana waxa uu ka dhigan yahay guul muhiim ah oo laga gaaray dagaalka aan kula jirno argagixisada,” ayuu yiri Xirsi.

Ciidamada Dowladda Federaalka ayaa muddooyinkii dambe kordhiyay howlgallada ay ka wadaan Gobolka Shabeellaha Hoose, oo hoostaga Maamulka Koonfur Galbeed. Howlgalladan ayaa isugu jiray weerarro qorsheysan iyo weerarro dhulka ah oo lagu doonayay in lagu burburiyo deegaannada ay Al-shabaab kaga sugan yihiin deegaannadaas.

Dilka Cabdulqaadir Xaaji Eenow ayaa loo arkaa mid dhabar jab weyn ku ah awoodda howlgallada ee Al-Shabaab ee Shabeellaha Hoose. Dowladdu waxay xaqiijisay inay ka go’an tahay sii wadista howlgalladan inta laga xaqiijinayo amniga guud ee gobolka lagana ciribtirayo guud ahaan falalka argagixisada.

Like it? Share it!

Leave A Response