Wararka dheeraad ayaa ka soo baxaya dagaal culus oo duleedka magaalada Marka ee xarunta gobolka Shabeellaha Hoose ku dhexmaray ciidamada Dowladda Soomaaliya iyo xubno ka tirsan Ururka Al-Shabaab.
Dad ku sugan degmada Marka ayaa warbaahinta u sheegay in ciidamada dowladda Soomaaliya gaar ahaan Guutada 14-ka Octooper weerar ku qaadeen deegaanka Jilib Marka, halkaas oo ay ku sugnaayeen Xubno ka tirsan Al-Shabaab,waxaana halkaasi ka dhacay dagaal culus oo geystay khasaaro dhimasho iyo dhaawac ah.
Inta la xaqiijiyay ilaa 5 ruux ayaa la sheegay in dagaalkaas duleedka Marka ku dhexmaray Ciidamada Dowladda iyo Ururka Al-Shabaab ay ku geerioyoodeen tira kalena ay ku dhaawacmeen,kuwaas oo u badan dhinacyada dagaalamay.
Magaalada Marka ayaa lagu wadaa in uu gaaro ra’iisal wasaaraha xukuumadda Soomaaliya Xassan Cali Kheyre oo maalmihii ugu danbeeyay socdaal ku marayay deegaannada Koonfur Galbeed Soomaaliya.