Faah faahin dheeraad ah ayaa waxaa laga helayaa tiro madaafiic ah oo galabta ku soo dhacday xaafada Geed Jaceyl, degmada Warta-nabadda ee gobolka Banaadir.

Madaafiicda oo tiro ahaan lagu sheegay ilaa Saddex xabo ayaa mid ka mid waxaa la sheegay inuu ku dhacay Laamiga Geed Jaceyl, kaasi oo khasaaraha ugu badan geystay.

Qof ka mid ah dadka degaanka ayaa sheegay inuu arkay dhaawacyada Shan qof oo Haweeney ay ku jirto, kuwaasi oo yaallay goobaha ay ku soo dhaceen Madaafiicda oo isku dhaw.

“Walaalow meeshaan dhibaato ayaa ka dhacday ilmo yar yar iyo dad waa weyn ayaa dhaawacmay, waxaa ugu daran madfaca ku soo dhacay laamiga, khasaaraha ugu badan midkaas ayaa geystay.” Ayuu yiri qof degaanka ah.

Isbitaalka Madiina ee Magaalada Muqdisho, ayaa waxaa la geeyay tiro dhaawacyo ah, kuwaasi oo ku soo dhaawacmay Madaafiicda ku dhacday Xaafadda Geed Jaceyl ee degmada Warta-nabadda.

Laamaha ammaanka dowladda federaalka wali kama aysan hadlin tirada madaafiicdan ku soo dhacday degmada Warta-nabadda iyo khasaaraha shacabka soo gaaray.