Xalay Saqdii dhexe ayaa waxaa qaraxyo iyo weeraro toos ah ay Al-Shabaab ka geysteen degmada Kaxda ee Gobolka Banaadir, Xaafada Daaru Salaam, degaanka Calamada iyo Ceelasha Biyaha oo dhamaantood ka mid ah Magaalada Muqdisho iyo duleedkeeda.
Weerarka Koowaad ayaa ka dhacay degmada Kaxda kadib markii Al-Shabaab ay Saldhiga degmada Kaxda ku qaadeen weerar ku billowday Gaari laga soo buuxiyay waxyaabaha qarxa, waxaana Saldhiga degmada ka dhacay dagaal culus oo la isku adeegsaday hubka noocyadiisa kala duwan.
Wararka ayaa sheegaya in Al-Shabaab ay in muddo ah la wareegeen Saldhiga degmada Kaxda, isla markaana ay dab qabad siiyeen qeyb kamid ah Saldhiga, iyaga oo ka qaatay laba gaari oo nooca dagaalka ah, waxaana jira khasaaro dhimasho & dhaawac ah oo ka dhashay dagaalka soona gaaray dhinacyada dagaalamay iyo dad Shacab ah.
Dhinaca kale weerar qarax ah & dagaal toos ah ayaa lagu weeraray saldhig Ciidamada dowladda ku leeyihiin Xaafada Daaru-salaam ee Gobolka Banaadir, waxaana halkaasi ka dhacay dagaal culus oo siweyn looga dareemay degmooyin ka tirsan Gobolka Banaadir, waxaa sidoo kale jira qarax lagu weeraray guddoomiye kuxigeenka Amniga & Siyaasadda Degmada Huriwaa Axmed Nuur Adeeroow, waxaana sida uu xaqiijiyay ka dhashay khasaaro dhimasho iyo dhaawac ah.
Degaanada Ceelasha Biyaha iyo Calamada ee duleedka Magaalada Muqdisho ayaa kamid ah goobaha weerarada ay xalay ka dhaceen kadib markii Al-Shabaab ay weerareen, waxaana xalay xaaladda Magaalada Muqdisho ay aheyd mid aad u kacsan, iyada oo meelo kamid ah Muqdisho ay ku dhaceen tiro hoobiyeyaal ah.
Wasiirka Amniga Soomaaliya Cabdullaahi Maxamed Nuur ayaa Bartiisa Facebook ku daabacay in Al-Shabaab ay xalay abaare 1:00am weerar kusoo qaadeen daafaha magaalada Muqdisho, balse ciidamada amniga ay iska difaaceen, isaga oo sheegay in faahfaahinta Shacabka la lawadaagi doonaan dhawaan ciidanka Booliska Dalka.
Dadka kunool Magaalada Muqdisho ayaa xalay waxaa ay dareemeen cabsi xoogan intii dagaalada iyo qaraxyada socdeen, iyada oo sirasmi ah loo heyn dadka ku dhintay iyo kuwa ku dhaawacmay dagaalads iyo qaraxyada ka dhacay Magaalada Muqdisho.