Ciidamada badda Soomaaliya ee ku sugan maamul goboleedka Puntland ayaa gacanta ku dhigay hub sharci darro ah, waxaana ay gacanta ku dhigeen shabakad la sheegay in ay ahaayeen burcad badeed Soomaali ah, kaddib howlgal ay ciidamada ammaanka ka sameeyeen deegaannada xeebaha ah.

Sida lagu sheegay war-saxaafadeed maanta oo Sabti ah ay soo saareen ciidamada badda Puntland, howlgalka ayaa ka dhacay degmada xeebta ah ee Eyl, kaasoo saraakiisha ay rumeysan yihiin inay ka mid tahay meelaha laga soo abaabulo weerarada lagu qaado maraakiibta caalamiga ah.

War saxaafadeedka ayaa sidoo kale lagu xusay in maamul goboleedyada ay si firfircoon u baadi goobayaan burcad-badeedda oo bishii hore lacag madax-furasho ah ka helay MV Abdullah, oo ah markab xamuul ah oo ka babanaayay calanka Bangladesh 5 milyan oo doollar. Markabkan oo siday shixnad aad u badan, ayaa la afduubay bishii March, xilli uu ka soo ambabaxay dalka Mozambique, kuna sii jeeday dalka Imaaraadka Carabta.
War saxaafadeedka ciidamada badda Puntland laguma sheegin tirada hubka la qabtay iyo halka loo waday, iyadoo gobolka oomanaha ah ee Waqooyi Bari Soomaaliya ay saldhigyo ku leeyihiin kooxaha Daacish iyo Al-Shabaab.

Intii uu howlgalka socday ayaa sidoo kale ciidamada badda waxa ay gacanta ku dhigeen dooni kaluumeysi oo laga leeyahay dalka Yemen oo kaluumeysi sharci darro ah ka waday xeebaha Puntland.

Burcadbadeeda Soomaalida ayaa qalalaase ka geystay biyaha xeebaha dheer ee dalka intii u dhexeysay sannadihii 2008 ilaa 2018. Waxay ku jireen hurdo la’aan illaa dabayaaqadii sannadkii hore markaasoo dhaqdhaqaaqyada burcadbadeedda ay billaabeen inay dib u soo laabtaan.