Howl-galkii Bankiga Horumarinta Afrika oo saddex maalmood ka socday magaalada Muqdisho ayaa la soo gebagebeeyey , iyadoo laga wada hadlay qiimeynta iyo horumarinta ujeedooyinka horumarineed ee Soomaaliya. Wafdigan oo ay hogaaminayaan Bubacarr Sankareh iyo Edward Sennoga, ayaa soo gebagebeeyey Warqada Istaraatiijiyadda Dalka Ku Meel Gaarka ah (I-CSP) ee 2022-2024 waxayna bilaabeen qorsheynta 2025-2029. Weftigu intii ay ku guda jireen socdaalkooda March 26 ilaa 28, 2024, waxa ay kulamo la yeesheen masuuliyiin kala duwan oo xukuumadda ka tirsan oo uu ka mid yahay Wasiirka Maaliyadda Biixi Cige, iyaga oo u kuur-galaya halka ay wax u marayaan, isla markaana u soo bandhigaan waxyaabaha mustaqbalka u mudnaanta leh.
Dooduhu waxay muujiyeen caqabadaha ugu waaweyn ee Soomaaliya ka jira, sida colaadaha, arrimaha dowladnimada, cilladaha kaabayaasha dhaqaalaha, iyo saameynta deegaanka. Bankigu wuxuu higsanayaa inuu ka caawiyo dowladda Soomaaliya wax ka qabashada arrimahan si loo kobciyo kobac loo dhan yahay iyo adkeysi dhaqaale. Cige waxa uu carrabka ku adkeeyay baahida loo qabo in la abuuro jawi maalgashi oo wanaagsan, kor loogu qaado sugnaanta cuntada, iyo ka faa’iidaysiga goobta istaraatiijiga ah ee Soomaaliya.
Taageerada joogtada ah ee bangiga ayaa la socota Qorshaha Isbadalka Qaran ee Soomaaliya, kaas oo la doonayo in lagu hormariyo kobaca dhaqan-dhaqaale, horumarinta nabadda iyo amniga, iyo horumarinta dib-u-habaynta maamulka. Bankiga ayaa hadda maamula 17 mashruuc oo Soomaaliya ka socda, kuwaas oo gaaraya ku dhawaad 221.61 milyan oo doolar, iyadoo waaxda gaadiidka ay ka hesho dhaqaalaha ugu badan.
Intii ay ku guda jireen booqashada, wafdigu waxay soo bandhigeen lix arrimood oo mudnaanta u leh dib-u-habaynta dawladda, kuwaas oo kala ah: Xasilinta dhaqaalaha, yaraynta khatarta cimilada, kobaca ganacsiga gaarka loo leeyahay, hagaajinta kaabayaasha dhaqaalaha, casriyaynta beeraha, iyo dhaqaalaynta kala duwan ee dhaqaalaha buluugga ah. Meelahan ayaa muhiim u ah horumarinta istaraatiijiyadeed ee Soomaaliya waxaana lagu dari doonaa warqadda Istaraatiijiyadda dalka ee soo socota.
Hawlgalka ayaa qayb ka ah dadaalka ballaaran ee bangigu ku doonayo in uu Soomaaliya ka taageero si ay uga gudubto caqabadaha dhanka horumarka ah iyo gaarista kobac waara. Natiijooyinka ka soo baxay wada-hadalladan ayaa sidoo kale ka muuqan doona Qorshaha Hagaajinta Portfolio-ga Dalka ee 2024-ka, iyadoo la hubinayo in la sii wado taageerada iyo la qabsiga baahiyaha Soomaaliya ee isa soo taraya.