Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa goordhaw Muqdisho ka furay shir wadatashi ah oo ay wada qaadanayaan Madaxdii hore iyo siyaasiyiinta dalka.

Shirkan oo la qorsheeyay in muddo labo maalin ah socdo ayaa  lagu gorfaynay doonaa xaaladda dalka, amniga, ciribtirka Al Shabaab, dib u eegista dastuurka, dimuqoraadiyeynta iyo doorashooyinka.

Madaxweynaha Soomaaliya ayaana warbixin ka siiyay madaxdii hore ee dalka xaalada siyaasadeed ee dalka ku sugan iyo sidoo kale sida dowladda uu hoggaamiyo u wajaheyso arrimaha doorashooyinka ee dalka.

Shirka inta uu socdo ayaa madaxda kala duwan ee ka qeyb galeysa kusoo bandhigi doonaan aragtiyadooda ku aadan arrimaha shirka lagu lafa gurayo ay ugu muhiimsan yihiin ammaanka, dib u eegista Dastuurka iyo arrimaha doorashooyinka dalka.