Wasaaradda Cadaaladda iyo Dastuurka Xukuumadda Federaalka ah ee Soomaaliya ayaa digniin adag oo laxiriirta lamacaamiilka Ururka Shabaab waxaa ay u dirtay nootaayooyinka kuyaalla Magaaladda Muqdisho.

Qoraal kasoo baxay Wasaaradda Cadaaladda Xukuumadda Soomaaliya ayaa waxaa lagu Sheegay inay soo gaartay cabasho ka timid qaar kamid ah Shacabka taas oo ah in qaar kamid ah Nootaatooyinka Muqdisho ay xogtooda la wadaagaan Al-Shabaab, taas oo ah fal dambi ah.

Sidoo kale waxaa ay sheegtay Wasaaradda in cabashadaas ay u gudbiyeen Hay’adaha Amniga si loo baaro, Isla markaana Nootaayooyinkii lagu helaa ay Wasaaraddu ruqsadda kala noqoneyso

“Qofkasta oo lagu helaa gacan siinta Argagaxisada wuxuu muteeysanayaa ciqaabta ku qeexan xeerka xiqaabta Soomaaliyeed iyo xeerarka kale ee uu dalka leeyahay ayaa lagu yiri” Qoraalka Wasaaradda.

Ugu dambeyn Wasaaradda Cadaaladda iyo Dastuurka Xukuumadda Federaalka ah ee Soomaaliya ayaa ugu baaqday Shacabka inay Wasaaradda la soo wadaagaan ciddii ay ku ogaadaan inay xogtooda u gudbisay Ururka Al-Shabaab .