Dowladda Federaalka ah ee Soomaaliya ayaa ku baaqday in si deg deg ah loo joojiyo colaadaha qabaa’ilka ah ee ka taagan Koonfur Galbeed oo muddooyinkii dambe cirka isku sii shareeray, kuwaasi oo geystay khasaare naf iyo maalba leh. Wasiiru dowlaha arrimaha gudaha Saadaad Caliyow ayaa soo hadal qaaday cawaaqib xumada ka dhalatay dagaalladii ka dhacay degmooyinka Buurhakaba, Diinsoor, Baraawe, Wanlaweyn, iyo Qoryooley, kuwaasoo isugu jiray dhimasho, dhaawac, barakac iyo burbur hantiyeed.

Saadaa Caliyow ayaa sidoo kale baaq soo jiidasho leh u jeediyay bulshada ay khusayso, isagoo ku nuux-nuuxsaday baahida loo qabo nabadda. “Waxaa jira beelo xiriirkooda uu ka xoog badan yahay dhulka laftiisa, wada noolaanshaha rabitaan ayaa ku dhisan ee ma ahan mid shaqsi ku dhisan, dagaalka joojiya, Alle ka cabsada, nabadna ku wada noolaada. “ayuu yidhi.

Caliyow oo hadalkiisa sii wata ayaa sidoo kale ku wargeliyay in Wasaaradiisa ay diyaar u tahay in ay la shaqeyso Wasiirka Gaadiidka, si ay gacan uga geystaan ​​daminta colaadaha ka jira Gobolka. Dagaalada qabaa’ilada ee socda kaliya kuma koobna xasiloonida degmooyinka balse waxa ay keeneen walaac balaaran oo ku saabsan amniga iyo horumarka deegaanada Koonfur Galbeed.