Hoggaamiyaha mucaaradka Raila Odinga ayaa ku baaqay in baaritaan dhab ah lagu sameeyo diyaaradii helikobterka ah ee lagu dilay taliyihii ciidamada difaaca Jeneral Francis Ogolla iyo sagaal sarkaal oo kale oo militari ah.
Isagoo ka hadlayay Xarunta Isboortiga ee Ulinzi ee Lang’ata, Nairobi intii lagu guda jiray xuska millatariga iyo xuska Sabtidii, Raila wuxuu sheegay in baaritaanada ay tahay in la caddeeyo sababta helikobtarka ay u soo dhacday.
“Sababtoo ah qaabka uu Ogolla u dhintay, xanta badan ayaa duulaya. Waxaan rabnaa in wararkaas la joojiyo,” ayuu yidhi.
Raila oo hadalkiisa sii wata ayaa sheegay in la gaaray waqtigii uu dalku eegi lahaa xaaladaha qalabkiisa ciidan.
“Waxaan aragnay tiro shilalkan ah shantii ilaa 10kii sano ee la soo dhaafay. Waxa jiray shilal aad u badan,” ayuu yidhi.
Ogolla ayaa ka mid ahaa 10-ka sarkaal ee ku dhintay shil diyaaradeed oo Khamiistii ka dhacay xadka u dhexeeya degmooyinka Elgeyo Marakwet iyo Uasin Gichu.
Diyaaradan oo ah nooca Milateri ayaa waxa ay booqasho ku joogtay ciidamo ka howlgala Waqooyi Galbeed Kenya si ay ula dagaalamaan dhaca lo’da, waxaana ay soo dhacday daqiiqado yar kadib markii ay ka kacday meel u dhow Dugsiga Sare ee Wiilasha ee Cheptulel ee Gobolka Galbeedka Pokot.
Ilaa hadda ma cadda sababta keentay burburka diyaaradda.
Dowladda ayaa durba u dirtay koox baaritaan ku sameeya shilkan diyaaradeed, kaasoo dhacay wax yar kadib markii ay duushay.
Baarayaasha ka socda ciidamada cirka ee Kenya iyo hogaanka dambi baarista ayaa booqday goobta ay diyaarada ku dhacday si ay u baaraan burburka diyaarada.
Meydka Ogolla ayaa loo duulin doonaa tuulada Ng’iya, ee hoos timaada Alego Usonga ee ismaamulka Siaya subaxnimada Axada si loo aaso isla maalintaas.
Labo askari ayaa ka bad baaday shilkaas waxaana ay ku jiraan isbitaal.
Ogolla ayaa horay u ahaa madaxa ciidamada cirka Kenya ka hor inta uusan gaarin taliye ku xigeenka ciidamada militariga,kadibna uu Ruto u dalacsiiyay sanadkii hore in uu noqdo madaxa ciidamada.
Jeneraalka ayaa ciidamada ku biiray sanadkii 1984-kii, waxaana uu tababar ku qaatay duuliye dagaal oo uu la qaatay ciidamada cirka Mareykanka iyo macalin duuliye ka noqday ciidamada cirka Kenya.
Raila ayaa sidoo kale amaan u qubeeyay jeneraalkii dhintay isagoo sheegay in uu si hufan oo hawlkar ah ugu adeegay dalka.
“Akhlaaqdiisa, Ogolla wuxuu muujiyay inuu jecel yahay waddankiisa oo uu diyaar u yahay inuu u adeego oo uu u dhinto magaca dalkan, waxaan ku kalsoonahay inaan maqalnay wiilkiisa oo ka hadlaya isaga, markaan arkay Joel oo halkaas ka hadlaya, waxaan idhi tani waa xaalad. Waxaan aragnay sida uu u fudud yahay Jeneraalka,” ayuu yiri.