Ugu yaraan 16 qof ayaa dhimatay kadib markii dooni ay ka soo raaceen Yemen ay ku dagtay xeebaha dalka Jabuuti, sida ay sheegtay hay’adda socdaalka adduunka ee Qaramada Midoobay Salaasadii.
Qoraal ay IOM soo dhigtay barteeda X oo hore loo odhan jiray Twitter-ka ayay ku tidhi “Musiibo doon ku dagtay xeebaha Djibouti oo ay saarnaayeen 77 qof oo tahriibayaal ah oo ay ku jiraan caruur,” iyadoo raacisay in ugu yaraan 28 qof la la’yahay.
Safiirka Itoobiya u fadhiya Jabuuti Berhanu Tsegaye, ayaa qoray, X in 33 qof ay ka badbaadeen musiibadan. Maamulka maxalliga ah ayaa IOM ka caawinayey hawlaha goobidda iyo samatabbixinta.
Tsegaye ayaa qoray in doonida ay la socdeen tahriibayaal Itoobiyaan ah oo ka yimid Yemen, wuxuuna sheegay in shilku uu habeenkii Isniinta ka dhacay meel ka baxsan Godoria ee waqooyi bari Jabuuti.
Shilkan oo dhacay laba toddobaad kadib shil kan la mid ah oo ay ku dhinteen 38 qof oo tahriibayaal ah
Shilkan oo dhacay Isniintii ayaa ku soo beegmay muddo laba toddobaad ah ka dib markii doon kale oo ay la socdeen inta badan muhaajiriin Itoobiyaan ahi ay ku degtay meel ka baxsan Djibouti.
Ugu yaraan 38 muhaajiriin ah ayaa ku dhintay doon ay saarnaayeen 66 muhaajiriin ah.
Hay’adda IOM ayaa sheegtay in sanad walba tobanaan kun oo muhaajiriin ah oo ka imaanaya Geeska Afrika gaar ahaan Itoobiya iyo Soomaaliya ay ka tagaan qaaradda iyaga oo sii mara dalka Jabuuti iyaga oo rajo ka qaba in ay shaqo ka helaan Sacuudiga iyo dalalka Khaliijka.
Si kastaba ha ahaatee, qaar badan ayaa ku guuldareystay, kumanaan ayaa ku go’doonsan Yemen halkaas oo ay la kulmaan xaalado aad u adag.
Sida laga soo xigtay tirooyinka IOM, ku dhawaad 100,000 oo qof, oo ku dhawaad kala bar ay yihiin dumar iyo carruur, ayaa safar halis ah uga soo tallaabay xeebaha Jabuuti ilaa Yemen sannadkii 2023-kii.
Hay’adda IOM ayaa sheegtay in marinkaasi uu yahay mid halis ah maadaama dadka wax tahriibiya ay beegsadaan dadka tahriibayaasha ah, waxaana ay la kulmaan afduub, xarig aan loo meel dayin, iyo in si qasab ah lagu askareeyo kooxaha dagaalka kula jira gaar ahaan Yemen.