Boqortooyada Midowday (UK) waxay Soomaaliya si buuxda u baabi’isay deymihii taariikhiga ahaa iyadoo la dhammaystiray Hindisaha HIPC, kaas oo ujeedkiisu yahay inuu ka caawiyo waddanka Geeska Afrika soo jiidashada maalgashiga, kobcinta kobaca dhaqaalaha, iyo dhismaha Soomaaliya ammaan iyo xasilloon.

Ku-xigeenka Ambassador Sam Thomas waxa uu sidaasi ku sheegay kulan uu magaalada Muqdisho kula yeeshay Wasiirka Wasaaradda Maaliyadda Biixi Iimaan Cige.

“Maanta waxaan u xaqiijiyey Wasiirka Maaliyadda Biixi in UK ay joojisay 100% deymihii taariikhiga ahaa ee lagu lahaa Soomaaliya, anagoo ah hormuudka cafinta daymaha Soomaaliya, waxaa naga go’an inaan gacan ka geysanno soo jiidashada maalgashiga iyo kobaca dhaqaalaha Soomaaliya,” ayay safaaradda UK ee Muqdisho ku daabacday qoraalkeeda X. hore Twitter).

Wasiirka Maaliyaddu waxa uu go’aankan ku tilmaamay mid cajiib ah oo kobcinaya horumarradii laga sameeyay wada-hadalladii naadiga Paris ee bishii hore.

Bishii la soo dhaafay, Paris Club, oo ay ku midaysan yihiin qaar ka mid ah dalalka ugu qanisan ayaa kansalay 99% deymihii lagu lahaa Soomaaliya, taasoo sare u kac weyn u ah xilli dalku uu sii wado ka soo kabashada dhaqaalaha jilicsan ee ka soo kabanaya colaado socday saddex iyo toban sano.

War qoraal ah oo uu soo saaray Naadiga Paris oo ay maamulaan saraakiil sare oo ka tirsan Hanti-dhowrka Faransiiska, deymaha Soomaaliya oo ay ku jiraan US, UK, Russia, Norway, iyo Japan, ayaa lagu shaaciyay in la kansalay $2bn oo lagu lahaa xubnaha naadiga laga bilaabo Janaayo 2023. .